Қорабулоқлик спортчилар бу йил Россия давлатининг Геленжик шаҳрида ўтказилган ёшлар ўртасидаги футбол турнирида биринчи марта иштирок этишди. Шунингдек, ўтган ҳафта Россия Федерациясининг Петропавловск-Камчатск шаҳрида ўтказилган волейбол турнирида 45 ёшдан юқори бўлган кишилар ўз маҳоратларини синаб кўришди.
Натижалар ёмон эмас, қувонарли. Биринчи марта қўшни давлатдаги рақобатчиларга қарши туриб, ўз ҳаракат ва интилишларини намоён қилган гуруҳ аъзолари биринчиликни қўлга киритишиб, ғалаба қозонишди.
“Бу турнир йил сайин узлуксиз равишда ўтказилиб турар экан. Кўпгина давлатлар қатори Қозоғистон терма жамоаси ҳам айни турнирда иштирок этишга таклиф қилинганди. Турнирда жами 10 та гуруҳ ўзаро куч синашишди. Уларнинг 5 таси ёшлар, 5 таси эса, катта ёшдаги спортчилар бўлди. Ёшлар ўртасида Қирғизистон давлати биринчи ўринни қўлга киритди. Катталар ўртасида эса, ғолиблик бизга насиб қилди. Албатта ушбу ютуқ ортида улкан машаққатлар турибди. Шунга қарамай, биз чин маънода бахтиёрмиз. Балки бу Яратганнинг бизга инъомидир. Келажакда бундай ютуқлар ёшларимизга ва бошқа спорт ишқибозларига ўрнак бўлса — арзийди” – дейди спортчи Ҳайдар Умаров ўзларини қарши олиш учун борганимизда.
Албатта! Интилганга толе ёр, дейишади азалдан. Ҳаракат қилиб, интилиб, мақсад қўйса, бу ўз натижасини беражакдир.
Биз юртдошларимизни навбатдаги ютуқлари билан қизғин қутлаб, уларга кириб келаётган Янги йилда, аввало, соғлик, оилаларига тинчлик, ўйинларига эса, омад тилаб қоламиз.
Ҳамиша юқори чўққиларни забт этиб, давлатимиз номини дунёга танитиб, байроғимизнинг ҳилпираб, мадҳиямизнинг жарангдор бўлишига ўз ҳиссаларини қўшишдан толишмасин!
С. БОЛТАБОЕВА.