Ассалому алайкум, “Жануб жарчилари” газетасининг ҳурматли ходимлари! Кириб келаётган 8 март — Халқаро хотин-қизлар байрами билан ҳаммангизни чин дилдан табриклайман!
Сизлар томондан йўлга қўйилган “Тахлам” (“Подшивка”) акциясидан жуда миннатдормиз. Миллатимиз болаларининг келажагига бефарқ бўлмасдан, шундай кенгқамровли акцияни бошлаб, уни давом эттириш ҳам анча мушкул иш. Лекин шунга қарамасдан, сизлар олдинга қараб ҳаракат қилаяпсизлар.
Газеталарингизни мактаб ўқувчиларига яқиндан таништиришда ҳомийлар ҳам баҳолиқудрат ҳиссаларини қўшаётган эканлар, бизлар уларгаям ўз раҳматларимизни айтамиз.
Она тилимизда чоп этилаётган газета-журналларни ўқиш орқали ўзбек тилимиз унутилмайди, унинг қадри тобора ортиб бораверади.
Бизнинг мактабимизга ушбу акция бўйича ҳар ҳафта етказилиб берилаётган газеталарга Орис қишлоғининг фахрли инсони, таниқли тадбиркор Равшан ака Ҳайтенов ҳомийлик қилмоқда. Биз сахий ва қўли очиқ, камтарин Равшан акага: топганларингиз тўйларга буюрсин, халқ хизматидан чарчаманг, деган илиқ сўзларни билдиришни лозим топдик.
Ўқувчиларимизнинг ўқишга бўлган қизиқувчанликлари ортиб, газетанинг келаси сонининг чиқишини интиқлик билан кутишади. Шу нарсани ўйлаб топган одамнинг ота-онасига катта раҳмат! Буларга қўшимча равишда Бадриддин Нишонқулов ва Гулираъно Расулованинг ҳам ёшларимизнинг маданиятли, билимли бўлишлари учун қўшаётган ҳиссалари жудаям каттадир! Натижада, ўқувчиларимизнинг маънавий ҳамда сўз бойликлари ортмоқда.
Ҳаммангизга омад, тинчлик тилаб, шундай яхши кунларда Оллоҳ дийдор кўришишни насиб этсин. Сизларнинг ҳимматларингиз туфайли мактабимизнинг юқори синф ўқувчилари газетани талашиб ўқишмоқда. Улардаги қизиқишни кўриб, очиғи, биз — устозлар ҳам мамнун бўлмоқдамиз. Биз шундай лойиҳаларни доимо қўллаймиз!
Яна бир бор байрам билан барчангизни чин дилдан табриклайман! Ҳар бир аёлнинг оиласида тинчлик бўлсин, тўй ва яхши кунлар бўлсин! Оналар фарзандларининг бахтига соғ-омон бўлишсин!
Орис қишлоғидаги Анортоев номли мактаб директорининг тарбиявий ишлар бўйича ўринбосари:
Алишер ҚЎШАНОВ.