Тадбиркорлик учун қайси йўналишни танлаш ҳар кимнинг ўз ихтиёрида. Турбатлик Сейилбек Қаипов ҳам тадбиркорлик учун спорт соҳасини танлади ва қишлоқда биринчи бўлиб, очиқ мини-футбол майдонини қурди.
У, қарийб 15 йил мобайнида Шимкент шаҳар спорт мактабида ёшларга футболдан устозлик қилиб келганди. Ҳозирги кунда эса, у Турбат қишлоғидаги “Октябрь 30 йиллиги” мактабида жисмоний тарбия фанидан дарс бермоқда.
– Ўтган йилнинг кўкламида фойдаланишга берилган спорт майдонида яқинда илк бор мини-футбол бўйича мусобақа ўтказилди, – дейди Сейилбек Қаипов. – Мазкур турнир жорий йил нишонланадиган Мустақилликнинг 25 йиллигига бағишланди.
Дарҳақиқат, футбол мажмуасида ёшларнинг машқ бажаришлари, чиниқишлари, машғулотлардан сўнг ювинишлари учун барча қулайликлар яратилган. Ушбу жойда келгусида ёпиқ мини-футбол майдонини қуриш ҳам режалаштирилган.
Кўплаб машҳур санъаткорлар-у таниқли адибларни етиштирган ушбу сўлим гўшадан келгусида атоқли футболчилар ҳам чиқса, не ажаб?!
Ҳамқишлоқлари орасида соғлом турмуш тарзини шакллантиришга баракали ҳисса қўшаётган Сейилбек Қаипов каби спорт жонкуярларига омад тилаймиз!
З. АҲМАДЖОНОВ.