Гулираъно РАСУЛОВА, “Жануб жарчилари” медиахолдингининг директори:
КЕЛИНГ, ТОМОША ҚИЛИНГ, ХУЛОСА ЧИҚАРИНГ! КЎЗЛАРИНГИЗ ҚУВОНЧГА, КЎНГИЛЛАРИНГИЗ ЭСА, ШОДЛИККА ТЎЛИБ ҚАЙТАСИЗ!
Шахсан ўзим шундай унутилмас таассуротлар билан қайтдим.
Қуйида мен ярим кунлик таассуротларимнигина кичик ҳажмдаги мақолада келтириб ўтишни жоиз топдим. Марҳамат, ўқинг!
“ЭКСПО-2017”нинг улкан мажмуаси аэропорт яқинида жойлашган бўлиб, уни чор атрофдан турли ҳайбатли бинолар, жумладан, бир томондан Назарбаев университети, бир томондан опера ва балет театри, яна бир томондан эса — Mega SilkWay маркази қуршаб турибди.
Кўргазма намойишлари эрталабки соат 9 дан бошланиб, ташрифчилар унга билет орқали киритилади. Борди-ю сизда кириш билети бўлмаса, уни ўша жойнинг ўзида кассадан сотиб олиш имконияти мавжуд.
Сиз-у бизга турли тасвирлар ва лавҳаларда ҳавола этилаётган шарсимон “ЭКСПО-2017” экспозициялари ичига киришда текшириш жараёни аэропортдаги каби юритилади. У ерда полиция ва Фавқулодда вазиятлар вазирлиги (ФВВ) ходимлари доимий равишда навбатчиликда туришади. Назоратдан ўтар экансиз, билетингиз сканер қилиниб, сиз рўйхатга олинасиз ва ичкарига қўйиласиз.
Агарда муҳим зарурат туғилиб, ташқарига чиқиб кетсангиз, қайта киришингиз учун янгидан билет сотиб олишингиз, яна текширувдан ўтишингиз керак бўлади.
Айтганча, саёҳатга эрталаб келишингизни маслаҳат берган бўлардим. Боиси, пешиндан кейин келувчилар сони 3 баробар ортиб, узоқ вақт навбат кутишингизга тўғри келади.
“ЭКСПО-2017”га киравериш жойида сизга юзларида самимий табассум билан чиройли қизлар пешвоз чиқадилар ва қувонч билан қарши олишади. Ва сизнинг саёҳатни қаердан бошлашингиз маъқуллиги ҳақида йўл-йўриқ кўрсатишади. Мустақил равишда айлангингиз келса, у ҳам ўз ихтиёрингизда! Тепага илинган ва каттагина қилиб кўрсатиб қўйилган харита кўмагида сиз истаган павильонингиз бўйлаб, хоҳлаганчалик саёҳат қила оласиз!
ҲАР ДАВЛАТНИНГ ЎЗИГА ЯРАША ЯНГИЛИГИ, ЭНЕРГИЯСИ, ЭКСПОЗИЦИЯСИ МАВЖУД. УЛАРНИ БИР ТОМОША ҚИЛИНГ-А!
Мени, аввало, эшик яқинида жойлашган Таиланд павильони ўзига жалб қилди. Нега, дейсизми? Боиси, бу ерда ўзларининг миллий либослари, рақслари, маданияти билан меҳмонларни қаршилаётган йигит-қизлар санъати ҳар қанақа инсоннинг эътиборини тортарди.
Павильон каттагина залдан иборат. Сизни кутиб олувчилар, аввало, қўлингизга совға (магнит ёки 5 дақиқали таиланд массажи) улашадилар ва ичкарига таклиф қилишади. Бу ерда, асосан, қўл ҳунармандчилигига кўпроқ эътибор берилган.
Ундан ўтиб, қўшни давлат — Ўзбекистон Республикаси павильонига бош суқдим. Қуёш энергияси билан қувватланувчи, атмосферага зарарли моддалар чиқармайдиган энг антиқа иккита автомобиль мазкур давлатнинг экспозицияси сифатида қўйилибди.
Очиғини айтганда, мен бу ерда бошқа кўпгина экспозиция ва янги технологиялар асосида яратилган нарсалар намойишини кутгандим. “ЭКСПО-2017” эндигина очилди, балки улар олдинги кунларда биз кутган ажойиботларни келтирсалар — не ажаб!
* * *
Мени ушбу саёҳат давомида лол қолдирган ва чуқур таассуротларга эга бўлишимга замин яратган – Россия павильони кўргазмаси бўлди. У ерда Арктика музлари эритилиб, энергияга айлантирилган. Ҳатто, айсберг муз бўлаги каттагина ҳовуз ичига жойлаштирилиб, томошабинларни ҳайратга солиб турибди. Ўз кўзларингиз билан кўриб, қалбингиз билан ҳис этсангиз — қандай гўзал манзара.
Тан олиш керак: Россия – келажак энергияси қандай бўлади? Кўргазмада эътибор кўпроқ мана шу савол жавобига қаратилган. Шунингдек, катта-ю кичикка бирдек қизиқ туйилган Россия давлати ҳақида маълумотлар деворий газеталарда келтирилган. Менимча, булар мактаб ўқувчиларига жуда асқатади.
“ЭКСПО” мажмуасида майдони жиҳатидан жуда катта жойни қамраб турган – Хитой Халқ Республикасининг павильони, десам адашмайман. Боиси, бу ерда ер энергиясини қандай қилиб заҳарли моддалардан асраш мумкин? Мана шу ҳақида турли кўргазмалар бор.
Ҳар давлатнинг ўзига хос ўзгачалиги бўлгани каби, Япония давлати павильонида ҳам бошқа қирраларни кўриш мумкин. Масалан, уларда атрофдаги муҳитга газ ва буғларни чиқармаслик борасида қандай ишлар амалга оширилаяпти? Айни шулар ҳақида мухтасар маълумотлар слайд орқали кўрсатилади.
* * *
Энди эътиборингизни ўзимизнинг давлатимиз, Ватанимиз, она юртимиз – Қозоғистон павильони кўргазмасига қаратсак, у, аввало, ўша шарсимон экспозициядир. 8 қаватдан иборат бинонинг ҳар бир қаватида турли энергия, жумладан, ер, шар, шамол, қуёш энергиялари ҳақида экспозициялар қўйилган. Космосга мўлжалланган экспозиция ҳам шулар сирасидан.
Павильонда 16 июнь кунидан эътиборан, “Cirque du Soleil” цирки ўз ишини бошлади. У ерда акробатлар ўзларининг турли трюкларини кўрсатишади.
Биздаги ўзгачалик ҳақида гапирар бўлсак, сизнинг тасвирингиз юқори портретда қайд этилади. Бу киши қалбига қувонч бахш этмаслиги мумкин эмас, назаримда.
“ЭКСПО-2017” – КЕЛАЖАК КЎЗГУСИ. ЎЗИНГИЗ ҲАМ ФАРЗАНДЛАРИНГИЗ ҲАМ БУНДАН БАҲРА ОЛИНГ. ШОШИЛИНГ, ТАШРИФ БУЮРИНГ!
Мана, яхшилар! Менинг 12 июнь санасидаги ярим кунлик саёҳатдан олган таассуротларим шундай. Лекин минг эшитгандан бир кўрган ортиқ, дейишган азалдагилар. Сизга маслаҳатим, бир дам ҳаёт ташвишларини чеккага суриб, қийин муаммоларга чеклов қўйиб, ўзингиз ва фарзандларингизнинг келажаги учун ушбу саёҳатга йўл олинг.
Илло, давлатимизда катта тарихий воқеа юз бермоқда. Дунёнинг 115 та мамлакатидан келтирилган кўргазмалардан баҳраманд бўлиб, дунёқарашингиз доираси кенгаяди, фикрлашингиз қамрови ўзгаради ва ғоя яратишингиз иштиёқи кескин кучаяди. Бунга, шахсан, кафолат бераман!
Агар ёш болали ёки ногирон яқинингиз бўлса, у ҳолда ҳам ташвиш йўқ. Кўргазма ичида бундай вазиятлар учун ҳам шароитлар яратилган. Болаларни велосипедлар ва коляскаларда, ногирон яқинингизни эса, махсус аравачада ичкарига олиб киришингиз мумкин.
Биргина муаммо: баланд пошнали пойафзал кийувчи қизлар-аёлларимиз бу ерда узоқ саёҳат қила олмасликлари мумкин. Сабаби, майдон катта. Ҳар бирини томоша қилиш жараёнида оёқларингиз чарчаб, юриш тезлигингиз пасайиб, толиқишингиз эҳтимолдан холи эмас.
Овқатланиш, тушлик қилиш ёки чой ичиш керак бўлса — бундай марказлар сон мингта. Ўз дидингиз ва шароитингизга қараб, овқатланиш жойини аниқлашингиз ҳамда танлашингиз ўзингизнинг изм-у ихтиёрингизда.
Вақт чегараланган, имкониятни қўлдан бой берманг!