Астана бўйлаб тасодифан қилган саёҳатим мен учун қизиқарли ва эсдан чиқмайдиган сайил бўлди. Ойнаижаҳон орқали кўрган бошқача-ю кўз билан кўрган бошқача экан. Менимча, минг марта эшитгандан кўра, бир марта кўрган яхши, деган гап бекор айтилмаган бўлса керак.
«ЭКСПО-2017» халқаро кўргазмасини ўғлим Сафамат билан тўрт-беш соат томоша қилсак-да, олган таассуротларимиз жуда ҳам катта. Тўққиз давлатнинг павильонларига кириб, улар билан танишдик. Иштирокчиларнинг меҳмондўстлиги, қўллари кўксида салом билан кутиб олишлари инсонга ўзгача қувонч бахш этади.
Одамлар гавжум йиғилган «Нур әлем» шарига ҳам ташриф буюрдик, Қозоғистоннинг павильонига қизиққан меҳмонларнинг сон-саноғи кўринмайди.
Миллатлараро тотувликни кўрганимда қувондим. Сабаби, Элбошимиз олиб бораётган оқилона сиёсатнинг орқасида мамлакатимизда шундай ажойиб ишлар олиб борилмоқда. Тинч ҳамда фаровон ҳаётимиз учун, авваламбор, Оллоҳимизга, кейин эса — президентимизга тасаннолар айтамиз.
Элимиз тинч, халқимиз омон бўлсин. Бундай катта ишлар янада кўпроқ уюштирилиб, давлатимиз равнақи, обрўси юқориларга кўтарилаверсин. Омин!
Гулнисо ҳожи она МИРАМЕТОВА,
Шимкент шаҳри.
Тасвирда: Гулнисо ҳожи она ўғли
Сафамат билан.