Шимкентнинг “Ўрдабаси” клуби Европа лигаси биринчи босқичининг илк ўйинини меҳмонда — Босниянинг “Широки Бриег” жамоасига қарши ўтказиб, 0:2 ҳисобида имкониятни бой берди.
Жавоб учрашуви Алматидаги марказий стадионга белгиланди. Сабаби кўпчиликка аён: Шимкентдаги “Қажимуқан” стадиони Европа талабларига жавоб бермайди ва натижада мазкур аренада Қозоғистон премьер лигасининг баҳслари ўтказилишига ҳам рухсат йўқ. Қачонки, ёритқичлар ўрнатилади ва ўшанда “Ўрдабаси” ўз майдонида уй учрашувларини ўтказади.
Демак, дастлаб Алматидаги учрашув олди воқеалари билан таништирсак: Босниянинг “Широки Бриег” жамоаси аъзолари мамлакатимизга кўк либосни кўтариб келишган. Ўз мухлисларининг олдида эришган ғалабадан сармаст бўлдими, билмадик, икки томоннинг келишуви бўйича “Ўрдабаси”нинг кўк либосда майдонга чиқишини унутишган.
УЕФА вакиллари уларга жарима солганларидан сўнг, вазиятдан чиқиш йўлини қидиришди ва “Қайрат”нинг сариқ либосларини катта маблағ эвазига харид қилишди. Шу тариқа улар вазиятдан чиқишди. Аксинча, боснияликлар: клуб ўйинга тайёр эмас, дея 0:3 ҳисобидаги техник мағлубият билан қайтишлари ҳеч гап эмасди.
Иккинчи эътиборли нарса — учрашув чипталарининг қимматлиги. “Ўрдабаси” Алматидаги “Марказий” стадионни ижарага олиш учун катта маблағ тўлаган бўлса ҳам, чипта нархини “Қайрат” клубининг вакиллари белгилашган. Унинг баҳоси 3000 тенгедан юқори бўлгани учун ҳам, маҳаллий мухлислар матчга, деярли келишмади. Фақат Шимкентдан борган икки автобус фанатлар бизнинг клубимизни қўллаб-қувватлашди.
“Ўрдабаси” таркибида муаммолар бор эди. Танат Нўсербаев стадионга чиқиб, машғулот ўтказган бўлса ҳам, ўйин қайдномасидан ўрин олмади. Унинг кичик жароҳати борлигини таъкидлаб ўтиш мумкин (орадан икки кун ўтиб, “Шахтёр”га қарши майдонга чиқди).
Алексей Петрушин майдонга Бекбаев, Ли, Смаков, Ковальчук, Нурғалиев, Фонтанелло, Тўлебек, Тунғишбаев, Диакате, Бочаров, Симчевичга ишонч билдириб чиқарди.
Меҳмонлар бош мураббийи Горан Саблич асосий таркибда Билобрк, Баришич, Чорич Дино, Чабрая, Менало, Чорич Йосип, Лончар, Бегоня, Бралич, Крстанович, Марковични чиқарди.
Учрашувни кўпчилик томоша қилгани учун хавфли вазиятларга тўхталиб ўтирмаймиз. «Ўрдабаси» футболчилари устунликка эга бўлсалар-да, ғалаба тугул, битта ҳам гол ура олмай, мухлисларини ранжитишди.
Шу тариқа вилоятимиз жамоаси қаторасига 3 йил биринчи давраданоқ Еврокубокни тарк этмоқда. Қизиғи, Қозоғистонда ўтган 3 та ўйин ҳам дуранг: 2015 йили «Бейтар» билан 0:0, 2016 йилда «Чукарички» билан 3:3 ва, энди «Широки Бриег» билан 0:0 ҳисобларида якунланган. Шунча кутилган баҳс муваффақиятсиз тамомланди.
«Широки Бриег»нинг келгуси рақиби Шотландиянинг «Абердин» жамоаси бўлади. Еврокубокда яхши ўйин кўрсатишни бошлаган «Иртиш» Сербиянинг «Црвена Звезда» командаси билан учрашади. «Қайрат» Албания вакили «Скандербеу» билан ким кучли, деган саволга жавоб излайди.
Тўлқин БАКИРХЎЖАЕВ,
Алмати шаҳридан махсус
«Жануб жарчилари» газетаси учун!