Ўзаро тажриба алмашиш мақсадида
уюштирилган семинар жудаям қизиқарли ўтди…
Олдинлари иқтисодиёт билан унчалик қизиқмас эдим. Соатлаб ўтказиладиган йиғинларнинг нима кераги бор, у ерда ўтирган тингловчилар зерикиб кетишмас эканми, дердим…
Бугунги иқтисодиётнинг равнақига бағишланган семинар-тренинг эса — ўзгача бўлди. Унинг бошланиши вилоятимиздаги кўпгина этномаданият жамоат бирлашмалари вакилларнинг ҳам эсларидан чиқмаса керак, назаримда. Сабаби: юз марта эшитгандан бир марта кўз билан кўрган афзал, демоқчи ушбу семинар аввал, айнан тадбиркорлик жойларига “саёҳат”дан бошланди.
Дастлаб мол боқиш жараёни билан танишдик, танишибгина қолмасдан, ҳайратланганимизни ҳам айтиб ўтиш ўринли бўлади. Чунки икки юз бош қора мол ва юз эллик бош отни бир жойда кўришнинг ўзи бўлмайди-да! Бундан ҳайратланган иштирокчилар ўзларининг туманларига, қишлоқдошларига кўрсатиш учун, тарғибот қилиш учун телефонларига суратга ҳам олишди!
Ҳа-ҳа, отлар ва сигирларни томоша қилдик. У ердаги ишчилар билан танишиб, мол боқиш жараёнидаги ўзгачаликлар билан танишиб, тажриба алмашдилар. Ундан кейин қассобхона томон йўл олдик. У ер ҳам замонавий талабларга жавоб берадиган даражада қурилган ва фаолият юритиб келаётган экан.
Ҳаммасидан ҳам зўри консервалаш цехидаги манзара эди. Консервани кўпчилик кўрган, лекин уни, айнан мана шу Қорабулоқ қишлоғида ишлаб чиқарадилар, деган гапга ишониш қийинроқ. Бу цехдан ҳам тўла таассуротлар билан чиқдик. Семинар иштирокчиларини суҳбатга чорлаймиз.
Муратали ҚАЛМУРАТОВ, вилоят Қозоғистон Халқи ассамблеяси раисининг ўринбосари, вилоят ҳокими аппарати ассамблея котибининг мудири:
–Жанубий Қозоғистон вилоятининг ҳокими, вилоят Қозоғистон Халқи ассамблеяси раиси Жансейит Туймебаев Қозоғистон Халқи ассамблеяси топшириғига биноан, вилоятимиздаги этномаданият жамоат бирлашмалари, фақат тадбирлар ва бошқариш ишлари, тил маданиятини ўрганиш билангина эмас, балки элимизнинг иқтисодиётига, ҳол-аҳволининг ривожланишига ўз ҳиссаларини қўшишлари керак, деган топшириқ берган эди. Шу муносабат билан, Қозоғистон Халқи ассамблеясининг ташкиллаштириши ҳамда вилоят ўзбек этномаданият жамоат бирлашмасининг таклифи билан бугун Сайрам туманининг Қорабулоқ қишлоғига ташриф буюрдик. Бу семинар-тренингга вилоятимизнинг турли жойларидан тадбиркорликка қизиққан кишилар қатнашмоқдалар.
Президентимизнинг Мактубида Қозоғистоннинг ривожланган 30 та мамлакат таркибига кириши учун аҳолининг 50 фоизи тадбиркорлик билан шуғулланиши керак, дея кўрсатилган. Бугунги кунда Сайрам туманида, атиги 12 фоиз аҳоли тадбиркорлик билан шуғулланар экан. Барча фуқаролар давлатимизнинг иқтисодий аҳволини яхшилашга ҳиссаларини қўшмоқлари даркор. Бунда, бевосита Қозоғистон Халқи ассамблеясиям ўз ҳиссасини қўшмоғи керак.
Маъмирхон ЙЎЛДОШЕВ, Туркистон шаҳри, Эски Иқон қишлоғи ҳокимиятининг вакили:
–Бу ердаги ташкиллаштириш ишлари яхши йўлга қўйилган экан. Тадбиркор чорвачилик билан шуғулланса, у ўзининг молини шу ерда сота олиш имкониятига эга экан. Бизда ҳам мол боқиш яхши ривожланган. Лекин уни сотиш сал қийинроқ. Шу семинар орқали анча нарсаларни ўргандик. Имкониятларни ўзимизда ҳам қўлласак, деган ниятимиз бор.
Йўлдош СУЛТОНОВ, Мақтаарал тумани тожик этномаданият жамоат бирлашмаси раисининг ўринбосари:
– Бугун биз учта тадбиркорлик ўрнига бордик. Уларда кўплаб инсонларни иш билан таъминлашган экан. Бизда, асосан экинчилик билан шуғулланишади. Чорвачиликни, якка корхоналарни кўпайтириш кераклигини тушундик. Тарғибот ишларини юритишни ҳам мақсад қилиб қайтаяпмиз.
Мирзағали ТОЛИБАЙ, Шимкент аграр коллежининг ўқитувчиси:
– Мазкур семинарга талабаларниям олиб келганмиз. Ўзим ҳам чорвачилик билан шуғулланганман, ҳозир шу йўналиш бўйича анча йиллардан буён дарс бериб келаётган бўлсам-да, бу ерда ўрганадиган кўп нарсалар бор экан. Бизда бир қишлоқда икки юз сигир яйловга чиқиб кетиб, ўтлаб келади. Бу ерда эса, бир уйда икки юз бош сигир боқишмоқда. Қассобхона ҳам барча талабларга жавоб беради.
Талабалар буларнинг ҳаммасини ўз кўзлари билан кўриб, уларда: ҳа, шундай бўлиши керак экан-да, деган тушунча пайдо бўлди.
Консервалаш цехидаги ишлар ҳам одамни хурсанд қилмай қўймайди. Бу ердаги аҳоли жуда ҳам меҳнаткаш. Уларга ишларида ривож тилаймиз.
Досмирза ЖУСИПОВ, Ўтрор тумани, тадбиркор:
– Ўзим чорвачилик ва деҳқончилик билан шуғулланаман. Ҳозир ҳаммасини ўз кўзимиз билан кўрдик. Энди туманимизга бориб, камчиликларимиз устида ишлаймиз.
* * *
Мана шунақа, меҳнаткаш, миришкор деҳқонларининг етиштираётган тотли узумлари, картошка, сабзи ва бошқа озиқ-овқат маҳсулотлари, чорвадорларнинг етиштираётган гўшт маҳсулотлари билан мамлакатимизга донғи кетган Қорабулоқ қишлоғи бўйлаб уюштирилган ижодий сафар мана шундай қизиқарли ва таассуротларга бой бўлди.
Яшасин, қорабулоқликлар! Қачонки, улар бор эканлар, Қозоғистон гўштсиз қолмайди!
Гулноза МАҚСАТОВА.