Қозоғистонимизнинг Семей шаҳрида ёшлар ва катталар (эркаклар) иштирокида пауэрлифтинг бўйича Қозоғистон чемпионати бўлиб ўтди. Чемпионатда республикамизнинг барча ўлкаларидан таниқли спортчилар қатнашишди ва улар орасида ўз имкониятларини синаб кўрган Шимкент шаҳрининг Сайрам даҳасидаги 12-сонли спорт мактабининг тарбияланувчилари ҳам яхши натижаларни қўлга киритиб қайтишди.
Учкураш машқлари (жим, ётган ҳолатда оғирликни куч билан кўтариш, оғирликни ердан узиб олиш)да ҳамюртимиз Каримжон Содиқов (59 килограмм вазнда) 75 килограмм натижа билан чемпионат ғолиби бўлди, унинг сафдошларидан Шариф Кураев (48 килограмм) жимда 90 килограмм натижа билан, Муроджон Содиқов (44 килограмм) 60 килограмм натижа билан чемпионат ғолибига айланишди.
Ғофуржон Абдураҳмонов (83 килограмм) 195 килограмм натижа билан чемпионатнинг кумуш медалига сазовор бўлса, Темур Темиршиқов (83 килограмм) 115 килограмм натижа билан, Азизбек Омонов (93 килограмм) 112 килограмм натижа билан ва Шоҳруз Ирисдавлатов (66 килограмм) 135 килограмм натижа билан фахрли учинчи ўринларни забт этишди.
Энг қувонарлиси — вакилларимиздан Каримжон Содиқов ҳамда Жавлон Шаукатов 2017 йилнинг август ойида Америкада бўлиб ўтадиган жаҳон чемпионатига йўлланма олдилар.
Эслатиб ўтамиз: ушбу спортчиларимизни вилоятимиздаги пауэрлифтинг бўйича таниқли устозларимиз – Қаҳрамон, Ғайрат ва Рустам Содиқовлар чемпионатга тайёрлашган.
И. ТОЖИБОЕВ,
Сайрам даҳаси.